ਤਾਜ ਤੇ ਸਿਰ

ਕਾਫ਼ੀ ਬਹਿਸ ਮੁਬਾਸੇ ਮਗਰੋਂ

ਮੈਂ ਉਸ ਨਾਲ ਸਹਿਮਤ ਸਾਂ
ਕਿ ਤਾਜ ਪਹਿਨਣ ਲਈ
ਸਿਰ ਹੋਣਾ ਜ਼ਰੂਰੀ ਹੈ।
ਉਹ ਵੀ ਮੇਰੇ ਨਾਲ ਮੁਤਫ਼ਿਕ ਸੀ
ਕਿ ਤਾਜ ਹਾਸਲ ਕਰਨ ਲਈ
ਸਿਰ ਦੇਣਾ ਵੀ ਲਾਜ਼ਮੀ ਹੈ।

ਕੁਝ ਦਿਨਾਂ ਬਾਅਦ ਜਦ ਅਸੀਂ ਮਿਲੇ
ਉਸ ਕੋਲ ਸਿਰ ਤਾਂ ਸੀ
ਪਰ ਤਾਜ ਨਹੀਂ ਸੀ
ਤੇ ਮੇਰੇ ਕੋਲ ਤਾਜ ਸੀ
ਪਰ ਸਿਰ ਨਹੀਂ ਸੀ।

ਮੈਂ ਅਜੇ ਸੋਚ ਹੀ ਰਿਹਾ ਸਾਂ
ਉਸ ਨੂੰ ਤਾਜ ਦੇ ਦਿਆਂ
ਕਿ ਉਸ ਦਾ ਸਿਰ ਮੰਗ ਲਵਾਂ
ਉਸ ਨੇ ਤਾਜ ਮੰਗ ਲਿਆ…।
ਹੁਣ ਉਸ ਕੋਲ ਸਿਰ ਵੀ ਸੀ ਤੇ ਤਾਜ ਵੀ!
ਮੇਰੇ ਕੋਲ ਨਾ ਸਿਰ ਸੀ ਨਾ ਤਾਜ ਸੀ!!

ਅਜਾਇਬ ਸਿੰਘ ਹੁੰਦਲ