ਕੱਚ ਦੀਆਂ ਅੱਖਾਂ ਦਾ ਇਸ਼ਾਰਾ ਕੱਚ ਦਾ ।
ਟੁੱਟ ਗਿਆ ਸੱਜਣਾ ਦਾ ਲਾਰਾ ਕੱਚ ਦਾ ।
ਅਜੇ ਤਾਂ ਮੈਂ ਉਹਨੂੰ ਕੂਲਾ ਹੱਥ ਲਾਉਣਾ ਸੀ,
ਅੰਬਰਾਂ ਚੋਂ ਟੁੱਟ ਗਿਆ ਤਾਰਾ ਕੱਚ ਦਾ ।
ਘਰ ਦੀ ਬਗੀਚੀ ਵਿਚ ਸਾਉਣ ਲੱਭਦੈਂ,
ਸਜਣਾ ਤੂੰ ਲਾ ਕੇ ਫੂਹਾਰਾ ਕੱਚ ਦਾ ।
ਸਾਨੂੰ ਕੀ ਪਤਾ ਸੀ ਇਕ ਦਿਨ ਸਜਣਾ,
ਨਿਕਲੇਗਾ ਤੇਰਾ ਇਹ ਸਹਾਰਾ ਕੱਚ ਦਾ ।
ਬਹੁਤਿਆਂ ਹੱਥਾਂ ਦੇ ਵਿਚ ਨਈ ਉਛਾਲੀ ਦਾ,
ਹੁੰਦਾ ਦਿਲ ਆਸ਼ਕ ਕੁਆਰਾ ਕੱਚ ਦਾ ।
ਭਖੀ ਹੋਈ ਦੁਪਹਿਰ ਵਿਚ ਨਹੀਓ ਪਾਈਦਾ,
ਚੰਗਾ ਨਹੀਓ ਹੁੰਦਾ ਲਿਸ਼ਕਾਰਾ ਕੱਚ ਦਾ ।
ਪਹਿਲਾਂ ਦਿਲ ਸਾਡਾ ਠੋਕਰਾਂ `ਚ ਤੋੜਤਾ,
ਕਿੰਝ ਦਿਆਂ ਜੋੜ ਕੇ ਦੁਬਾਰਾ ਕੱਚ ਦਾ ।
ਨੰਗੇ ਪੈਰੀਂ ਤੁਰਿਆ ਨਾ ਕਰ ਕੁੜੀਏ,
ਗਲੀ ਗਲੀ ਪਇਆ ਏ ਖਲਾਰਾ ਕੱਚ ਦਾ ।
ਪੱਥਰਾਂ ਦੀ ਧਰਤੀ ਤੇ ਤੂੰ ਛੱਤਿਆ,
“ਤਾਲਿਬ” ਦੇ ਸਾਹਮਣੇ ਚੁਬਾਰਾ ਕੱਚ ਦਾ ।
ਵਿਜੇ ਕੁਮਾਰ ਤਾਲਿਬ