ਤਕਨੀਕੀ ਨੁਕਸ ਕਾਰਨ ਰੇਲ ਸੇਵਾਵਾਂ ਹੋਈਆਂ ਪ੍ਰਭਾਵਿਤ

ਕੈਲਗਰੀ,  ਡਾਊਨ ਟਾਊਨ ਕੈਲਗਰੀ ‘ਚ ਪਏ ਤਕਨੀਕੀ ਨੁਕਸ ਕਾਰਨ ਰੇਲ ਸੇਵਾਵਾਂ ਪ੍ਰਭਾਵਿਤ ਹੋਈਆਂ, ਜਿਸ ਕਾਰਨ ਰੋਜ਼ਾਨਾ ਸਫਰ ਕਰਦੇ ਹਜ਼ਾਰਾਂ ਮੁਸਾਫਿਰਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ | ਪ੍ਰਾਪਤ ਵੇਰਵੇ ਅਨੁਸਾਰ ਸਵੇਰੇ ਰੇਲ ਪ੍ਰਣਾਲੀ ‘ਚ ਨੁਕਸ ਪਿਆ, ਜਿਸ ਕਾਰਨ ਕਈ ਘੰਟੇ ਰੇਲ ਸੇਵਾਵਾਂ ਠੱਪ ਰਹੀਆਂ | ਬਾਰਿਸ਼ ਨੇ ਮੁਸਾਫਰਾਂ ਦੀਆਂ ਮੁਸ਼ਕਿਲਾਂ ਹੋਰ ਵਧਾ ਦਿੱਤੀਆਂ ਤੇ ਉਨ੍ਹਾਂ ਨੂੰ ਵਰ੍ਹਦੇ ਮੀਂਹ ਵਿਚ ਬੱਸਾਂ ਦਾ ਇੰਤਜਾਰ ਕਰਨਾ ਪਿਆ | ਕੈਲਗਰੀ ਟਰਾਂਜਿਟ ਦੇ ਕਾਰਜਕਾਰੀ ਡਾਇਰੈਕਟਰ ਰਸਲ ਡੇਵੀਜ ਨੇ ਦੱਸਿਆ ਕਿ ਅਜਿਹਾ ਲੱਗਦਾ ਹੈ ਕਿ ਬਿਜਲੀ ਦੀ ਖਰਾਬੀ ਕਾਰਨ ਰੇਲ ਸੇਵਾਵਾਂ ਪ੍ਰਭਾਵਿਤ ਹੋਈਆਂ ਹਨ | ਬਾਅਦ ‘ਚ ਪਤਾ ਲੱਗਾ ਕਿ ਬਿਜਲੀ ਦੀਆਂ ਲਾਈਨਾਂ ਨੂੰ ਆਪਸ ਵਿਚ ਜੋੜਨ ਵਾਲੇ ਇਕ ਉਪਕਰਨ ‘ਚ ਨੁਕਸ ਪੈਣ ਕਾਰਨ ਮੁਸਾਫਿਰਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ ਹੈ | ਡੇਵੀਸ ਅਨੁਸਾਰ ਸਿਟੀ ਹਾਲ ਸਟੇਸ਼ਨ ਜਿੱਥੇ ਇਹ ਨੁਕਸ ਪਿਆ, ਇਕ ਅਹਿਮ ਕੇਂਦਰ ਹੈ | ਇੱਥੇ ਬਲਿਊ ਤੇ ਰੈੱਡ ਦੋਨਾਂ ਲਾਈਨਾਂ ਇਕੱਠੀਆਂ ਹੁੰਦੀਆਂ ਹਨ | ਇਸ ਕਾਰਨ ਡਾਊਨ ਟਾਊਨ ਅਤੇ ਨਾਲ ਲੱਗਦੇ ਹੋਰ ਖੇਤਰਾਂ ‘ਚ ਵੀ ਵੱਡੀ ਪੱਧਰ ‘ਤੇ ਰੇਲ ਸੇਵਾਵਾਂ ਉੱਪਰ ਅਸਰ ਪਿਆ ਅਤੇ ਕੋਈ 4 ਘੰਟੇ ਦੀ ਜਦੋ-ਜਹਿਦ ਤੋਂ ਬਾਅਦ ਰੇਲ ਸੇਵਾਵਾਂ ਆਮ ਵਾਂਗ ਸ਼ੁਰੂ ਹੋਈਆਂ |