ਪ੍ਰੀਤੋ ਟਾਪ ਟੈਨ ਫ਼ੇਮ ਅੰਸ਼ੁ ਸਾਹਨੀ ਦਾ ਪਾਸਪੋਰਟ ਜਬਤ,ਖੁਦ ਨੂੰ ਅਣਵਿਆਹੀ ਕਹਿ ਬਣਵਾਏ ਪਾਸਪੋਰਟ ਉੱਤੇ ਕੀਤੀ ਵਿਦੇਸ਼ ਸੈਰ

ਚੰਡੀਗੜ੍ਹ,30 ਅਕਤੂਬਰ (ਦੇਸ ਪ੍ਰਦੇਸ ਟਾਈਮਜ਼)-ਪੀਟੀਸੀ ਟੀ.ਵੀ. ਚੈਨਲ ਦੇ ਪ੍ਰੋਗਰਾਮ ਪ੍ਰੀਤੋ ਟਾਪ ਟੈਨ ਨਾਲ ਮਸ਼ਹੂਰ ਹੋਈ ਪੰਜਾਬੀ ਫਿਲਮ ਅਭਿਨੈਤਰੀ ਅੰਸ਼ੁ ਸਾਹਨੀ ਵਲੋਂ ਵਿਆਹੇ ਹੋਣ ਦੇ ਬਾਵਜੂਦ ਖੁਦ ਨੂੰ ਅਣਵਿਆਹੀ ਦੱਸ ਕੇ ਬਣਵਾਏ ਪਾਸਪੋਰਟ ਨੂੰ ਖੇਤਰੀ ਪਾਸਪੋਰਟ ਦਫਤਰ (ਆਰ.ਪੀ.ਓ.) ਚੰਡੀਗੜ੍ਹ ਨੇ ਜਬਤ ਕਰ ਲਿਆ ਹੈ. ਇਹ ਕਾਰਵਾਈ ਚੰਡੀਗੜ੍ਹ ਦੇ ਸੈਕਟਰ-34 ਪੁਲਿਸ ਥਾਣੇ ਵਲੋਂ ਇਸ ਮਾਮਲੇ ਦੀ ਕੀਤੀ ਗਈ ਜਾਂਚ ਦੌਰਾਨ ਇਸ ਦੀ ਪੁਸ਼ਟੀ ਹੋ ਜਾਣ ਉੱਤੇ ਐੱਸ.ਐੱਸ.ਪੀ. ਨੌਨਿਹਾਲ ਸਿੰਘ ਵਲੋਂ ਪਾਸਪੋਰਟ ਦਫਤਰ ਨੂੰ ਲਿਖਤੀ ਤੌਰ ਉੱਤੇ ਰੁੱਕਾ ਭੇਜੇ ਜਾਣ ਉੱਤੇ ਕੀਤੀ ਗਈ. ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਿਕ ਅੰਸ਼ੁ ਸਾਹਨੀ ਦਾ ਵਿਆਹ ਸਾਲ 2006 ਵਿਚ ਲੁਧਿਆਣਾ ਰਹਿੰਦੇ ਹਰਜਿੰਦਰ ਸਿੰਘ ਨਾਮੀਂ ਵਿਅਕਤੀ ਨਾਲ ਹੋਇਆ ਸੀ, ਪਰ ਵਿਆਹ ਤੋਂ ਕੁਝ ਸਮੇ ਬਾਅਦ ਹੀ ਦੋਵਾਂ ਵਿਚ ਅਣਬਣ ਰਹਿਣ ਲੱਗ ਪਈ ਅਤੇ ਉਸ ਮਗਰੋਂ ਉਹ ਵਖਰੇ-ਵਖਰੇ ਰਹਿਣ ਲੱਗ ਪਏ. ਇਸੇ ਦੌਰਾਨ ਦੋਵਾਂ ਧਿਰਾਂ ਵਲੋਂ ਇੱਕ-ਦੂਜੇ ਖਿਲਾਫ਼ ਅਦਾਲਤੀ ਕੇਸ ਵੀ ਪਾਏ ਹੋਏ ਹਨ. ਪਰ ਇਸੇ ਦੌਰਾਨ ਹਰਜਿੰਦਰ ਸਿੰਘ ਮੁਤਾਬਿਕ ਉਸਨੂੰ ਆਪਣੀ ਪਤਨੀ ਵਲੋਂ ਗਲਤ ਜਾਣਕਾਰੀ ਦੇ ਅਧਾਰ ਉੱਤੇ ਵਿਦੇਸ਼ ਚਲੇ ਜਾਣ ਦੀ ਜਾਣਕਾਰੀ ਮਿਲੀ ਅਤੇ ਉਸਨੇ ਇਸ ਦੀ ਸ਼ਿਕਾਇਤ ਚੰਡੀਗੜ੍ਹ ਪੁਲਿਸ ਨੂੰ ਦਿੱਤੀ। ਸੈਕਟਰ-34 ਥਾਣੇ ਦੀ ਪੁਲਿਸ ਵਲੋਂ ਇਸ ਦੀ ਜਾਂਚ ਕੀਤੇ ਜਾਣ ਉੱਤੇ ਇਹ ਗੱਲ ਸਹੀ ਪਾਈ ਗਈ ਕਿ ਅੰਸ਼ੁ ਵਲੋਂ ਵਿਆਹ ਤੋਂ ਕਰੀਬ ਚਾਰ ਸਾਲ ਬਾਅਦ 13 ਸਤੰਬਰ 2010 ਨੂੰ ਬਣਵਾਇਆ ਗਿਆ ਪਾਸਪੋਰਟ ਜੇ-2448218 ਉਸ ਵਲੋਂ ਆਪਣੇ ਵਿਆਹੇ ਹੋਣ ਦੀ ਅਹਿਮ ਅਤੇ ਪਾਸਪੋਰਟ ਬਣਵਾਉਣ ਸਮੇਂ ਲਾਜਮੀ ਕਰਾਰ ਦਿੱਤੀ ਹੋਈ ਜਾਣਕਾਰੀ ਨੂੰ ਛੁਪਾ ਕੇ ਬਣਵਾਇਆ ਗਿਆ ਹੈ. ਜਿਸ ਉੱਤੇ ਐੱਸ.ਐੱਸ.ਪੀ. ਦਫਤਰ ਨੂੰ ਭੇਜੀ ਗਈ ਰਿਪੋਰਟ ਉੱਤੇ ਵਧੀਕ ਡੀ.ਏ. (ਲੀਗਲ) ਵਲੋਂ ਕਨੂੰਨੀ ਰਾਏ ਦਿੰਦੇ ਹੋਏ ਇਸ ਨੂੰ ਪਾਸਪੋਰਟ ਐਕਟ ਦੀ ਧਾਰਾ 12 ਦੇ ਤਹਿਤ ਅਪਰਾਧ ਕਰਾਰ ਦਿੰਦਿਆਂ ਪਾਸਪੋਰਟ ਅਥਾਰਟੀ ਨੂੰ ਉਕਤ ਪਾਸਪੋਰਟ ਜਬਤ ਜਾਂ ਰੱਦ ਕੀਤੇ ਜਾਣ ਦੀ ਸਿਫਾਰਿਸ਼ ਕੀਤੀ ਗਈ. ਇਸ ਉੱਤੇ ਖੇਤਰੀ ਪਾਸਪੋਰਟ ਚੰਡੀਗੜ੍ਹ ਵਲੋਂ ਬੀਤੀ 12 ਸਤੰਬਰ ਨੂੰ ਹੀ ਅੰਸ਼ੁ ਨੂੰ ਨੋਟਿਸ ਜਾਰੀ ਕਰਦਿਆਂ 4 ਅਕਤੂਬਰ ਨੂੰ ਉਸਦਾ ਪਾਸਪੋਰਟ ਜਬਤ ਕਰ ਲਿਆ. ਖੇਤਰੀ ਪਾਸਪੋਰਟ ਅਧਿਕਾਰੀ ਵਲੋਂ ਬਾਰੇ ਪੁਛੇ ਜਾਣ ਉੱਤੇ ਪੁਲਿਸ ਦੀ ਜਾਂਚ ਮੁਤਾਬਿਕ ਭੇਜੀ ਗਈ ਸੂਚਨਾ ਮੁਤਾਬਿਕ ਕਾਰਵਾਈ ਕੀਤੀ ਗਈ ਹੈ. ਓਧਰ ਦੂਜੇ ਪਾਸੇ ਅੰਸ਼ੁ ਦੇ ਪਤੀ ਹਰਜਿੰਦਰ ਸਿੰਘ ਨੇ ਆਪਣੀ ਪਤਨੀ ਵਲੋਂ ਖੁਦ ਨੂੰ ਅਣਵਿਆਹੀ ਦੱਸ ਕੇ ਪਾਸਪੋਰਟ ਬਣਵਾਉਣ ਦਾ ਮਨੋਰਥ ਵਿਦੇਸ਼ ਭੱਜ ਕੇ ਦੂਜਾ ਵਿਆਹ ਕਰਵਾਏ ਜਾਣਾ ਦੱਸਿਆ ਹੈ. ਉਸਨੇ ਚੰਡੀਗੜ੍ਹ ਪੁਲਿਸ ਉੱਤੇ ਵੀ ਅਧੂਰੀ ਕਾਰਵਾਈ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ ਇਸੇ ਸੈਕਟਰ-34 ਪੁਲਿਸ ਥਾਣੇ ਵਿਚ ਅਜਿਹੇ ਇੱਕ ਹੋਰ ਕੇਸ (ਮਿਤੀ 4 ਫਰਵਰੀ, 2013) ਵਿਚ ਐਫ਼.ਆਈ.ਆਰ ਨੰਬਰ 63 ਰਾਹੀਂ ਪਾਸਪੋਰਟ ਵਿਚ ਆਪਣੇ ਵਿਆਹ ਬਾਰੇ ਇਸੇ ਤਰ੍ਹਾਂ ਗਲਤ ਜਾਣਕਾਰੀ ਦੇਣ ਵਾਲੇ ਖਿਲਾਫ਼ ਭਾਰਤੀ ਦੰਡਾਵਲੀ ਦੀ ਧਾਰਾ 420 ਤਹਿਤ ਧੋਖਾਧੜੀ ਦੀ ਕਾਰਵਾਈ ਕਰਦਿਆਂ ਉਸਨੂੰ ਜੇਲ੍ਹ ਭੇਜ ਦਿੱਤਾ। ਉਸ ਨੇ ਆਪਣੀ ਪਤਨੀ ਅੰਸ਼ੁ ਉੱਤੇ ਵੀ ਪਾਸਪੋਰਟ ਬਣਵਾਉਣ ਲਈ ਪਹਿਲਾਂ ਪੁਲਿਸ ਨੂੰ, ਫਿਰ ਪਾਸਪੋਰਟ ਅਥਾਰਟੀ ਅਤੇ ਆਪਣੇ ਪਤੀ ਨਾਲ ਧੋਖਾਧੜੀ ਕਰਨ ਦਾ ਦੋਸ਼ ਲਗਾਉਂਦਿਆਂ ਇਸ ਕੇਸ ਵਿਚ ਵੀ ਧਾਰਾ 420 ਜੋੜਨ ਦੀ ਮੰਗ ਕਰਦਿਆਂ ਮਾਮਲਾ ਅਦਾਲਤ ਲਿਜਾਏ ਜਾਣ ਦੀ ਚਿਤਾਵਨੀ ਦਿੱਤੀ ਹੈ.